Ac sic Dardanidûm mediam se matribus infert :
O miserae, quas non manus, inquit, Achaïca bello Traxerit ad letum patriae sub moenibus! o gens Infelix, cui te exitio Fortuna reservat ?
Septuma post Troiae excidium jam vertitur aestas, Quom freta, quom terras omnis, tot inhospita saxa, Sideraque emensae ferimur: dum per mare magnum Italiam sequimur fugientem, et volvimur undis. Hic Erycis fines fraterni, atque hospes Acestes. Quid prohibet muros jacere, et dare civibus urbem? O patria, et rapti nequidquam ex hoste Penates, Nullane jam Troiae dicentur moenia? nusquam Hectoreos amnis, Xanthum et Simoënta videbo ? Quin agite, et mecum infaustas exurite puppis. Nam mihi Cassandrae per somnum vatis imago Ardentis dare visa faces: Hîc quaerite Troiam; Hîc domus est, inquit, vobis. jam tempus agi res: Nec tantis mora prodigiis. en quatuor arae Neptuno. deus ipse faces animumque ministrat.
Haec memorans, prima infensum vi conripit ignem, Sublataque procul dextra connixa coruscat,
Et jacit. adrectae mentes, stupefactaque corda Iliadum. hîc una e multis, quae maxuma natu, Pyrgo, tot Priami natorum regia nutrix: Non Beroë vobis, non haec Rhoeteïa, matres, Est Dorycli conjunx. divini signa decoris, Ardentisque notate oculos; qui spiritus illi, Qui voltus, vocisve sonus, vel gressus eunti. Ipsa egomet dudum Beroën digressa reliqui Aegram, indignantem, tali quod sola careret Munere, nec meritos Anchisae inferret honores. Haec effata.
At matres, primo ancipites, oculisque malignis
Ambiguae spectare rates, miserum inter amorem Praesentis terrae, fatisque vocantia regná: Quom dea se paribus per coelum sustulit alis, Ingentemque fuga secuit sub nubibus arcum. Tum vero adtonitae monstris, actaeque furore Conclamant, rapiuntque focis penetralibus ignem : Pars spoliant aras, frondem, ac virgulta, facesque Conjiciunt. furit inmissis Volcanus habenis Transtra per et remos, et pictas abiete puppis. Nuntius Anchisae ad tumulum, cuneosque theatri, Incensas perfert navis Eumelus: et ipsi Respiciunt atram in nimbo volitare favillam. Primus et Ascanius, cursus ut laetus equestres Ducebat, sic acer equo turbata petivit
Castra nec exanimes possunt retinere magistri.
Quis furor iste novus? quo nunc, quo tenditis, inquit, Heu miserae cives ? non hostem, inimicaque castra Argivôm, vestras spes uritis. en ego vester Ascanius galeam ante pedes projecit inanem, Qua ludo indutus belli simulacra ciebat. Adcelerat simul Aeneas, simul agmina Teucrûm. Ast illae diversa metu per litora passim Diffugiunt; silvasque, et sicubi concava furtim Saxa, petunt. piget incepti, lucisque, suosque Mutatae adgnoscunt, excussaque pectore Juno est. Sed non idcirco flammae atque incendia vires Indomitas posuere udo sub robore vivit. Stuppa vomens tardum fumum, lentusque carinas Est vapor, et toto descendit corpore pestis: Nec vires heroum infusaque flumina prosunt. Tum pius Aeneas humeris abscindere vestem, Auxilioque vocare deos, et tendere palmas : Juppiter omnipotens, si nondum exosus ad unum
Troianos, si quid pietas antiqua labores Respicit humanos; da flammam evadere classi Nunc, Pater, et tenuis Teucrûm res eripe leto. Vel tu, quod superest, infesto fulmine morti; Si mereor, demitte, tuaque hîc obrue dextra. Vix haec ediderat, quom effusis imbribus atra Tempestas sine more furit, tonitruque tremiscunt Ardua terrarum, et campi ruit aethere toto Turbidus imber aqua, densisque nigerrimus Austris: Inplenturque super puppes; semiusta madescunt Robora. restinctus donec vapor omnis, et omnes, Quatuor amissis, servatae a peste carinae.
At pater Aeneas, casu concussus acerbo, Nunc huc ingentis, nunc illuc pectore curas Mutabat, versans; Siculisne resideret arvis, Oblitus fatorum, Italasne capesseret oras. Tum senior Nautes, unum Tritonia Pallas Quem docuit, multaque insignem reddidit arte! Hic responsa dabat, vel quae portenderet ira Magna deûm, vel quae fatorum posceret ordo; Isque his Aenean solatus vocibus infit:
Nate dea, quo fata trahunt retrahuntque, sequamur; Quidquid erit, superanda omnis fortuna ferendo est. Est tibi Dardanius divinae stirpis Acestes:
Hunc cape consiliis socium, et conjunge volentem: Huic trade, amissis superant qui navibus, et quòs Pertaesum magni incepti rerumque tuarum est: Longaevosque senes, ac fessas aequore matres, Et quidquid tecum invalidum metuensque pericli est Delige et his habeant terris, sine, moenia fessi: Urbem adpellabunt permisso nomine Acestama
Talibus incensus dictis senioris amici. Tum vero in curas animum diducitur omnis:
Et Nox atra polum bigis subvecta tenebat. Visa dehinc coelo facies delabsa parentis Anchisae subito talis effundere voces:
Nate, mihi vita quondam, dum vita manebat, Care magis; nate, Iliacis exercite fatis ;
Imperio Jovis huc venio, qui classibus ignem Depulit, et coelo tandem miseratus ab alto est. Consiliis pare, quae nunc pulcherrima Nautes Dat senior lectos juvenes, fortissima corda, Defer in Italiam. gens dura atque aspera cultu Debellanda tibi Latio est. Ditis tamen ante Infernas adcede domos, et Averna per alta
Congressus pete, nate, meos. non me inpia namque Tartara habent, tristes umbrae; sed amoena piorum Concilia, Elysiumque colo. huc casta Sibylla Nigrarum multo pecudum te sanguine ducet.
Tum genus omne tuum, et, quae dentur moenia, disces. Jamque vale. torquet medios Nox humida cursus: Et me saevus equis Oriens adflavit anhelis. Dixerat et tenuis fugit, ceu fumus, in auras, Aeneas, Quo deinde ruis? quo proripis? inquit, Quem fugis? aut quis te nostris conplexibus arcet ? Hacc memorans cinerem et sopitos suscitat ignis; Pergameumque Larem, et canae penetralia Vestae Farre pio et plena supplex vencratur acerra.
Extemplo socios primumque arcessit Acesten, Et Jovis imperium, et cari praecepta parentis Edocet, et quae nunc animo sententia constet, Haud mora consiliis, nec jussa recusat Acestes. Transcribunt urbi matres, populumque volentem Deponunt, animos nil magnae laudis egentes. Ipsi transtra novant, flammisque ambesa reponunt Robora navigiis aptant remosque rudentesque,
Exigui numero, sed bello vivida virtus.
Interea Aeneas urbem designat aratro,
Sortiturque domos : hocc' Ilium, et haec loca Troiam Esse jubet. gaudet regno Troianus Acestes, Indicitque forum, et patribus dat jura vocatis. Tum vicina astris Erycino in vertice sedes Fundatur Veneri Idaliae; tumuloque sacerdos Ac lucus late sacer additur Anchiseo.
Jamque dies epulata novem gens omnis, et aris Factus honos; placidi straverunt aequora venti : Creber et adspirans rursus vocat Auster in altum. Exoritur procurva ingens per litora fletus: Conplexi inter se noctemque diemque morantur. Ipsae jam matres, ipsi, quibus aspera quondam Visa maris facies, et non tolerabile nomen, Ire volunt, omnemque fugae perferre laborem. Quos bonus Aeneas dictis solatur amicis, Et consanguineo lacrimans conmendat Acestae. Tris Eryci vitulos, et Tempestatibus agnam, Caedere deinde jubet, solvique ex ordine funem. Ipse, caput tonsae foliis evinctus olivae
Stans procul in prora pateram tenet, extaque salsos Porricit in fluctus, ac vina liquentia fundit. Prosequitur surgens a puppi ventus euntis. Certatim socii feriunt mare, et aequora verrunt. At Venus interea Neptunum exercita curis Adloquitur, talisque effundit pectore questus: Junonis gravis ira, nec exsaturabile pectus, Cogunt me, Neptune, preces descendere in omnis : Quam nec longa dies, pietas nec mitigat ulla; Nec Jovis imperio fatisve infracta quiescit. Non media de gente Phrygum exedisse nefandis Urbem odiis satis est, nec poenam traxe per omnem
« PreviousContinue » |