(Quando aliud mihi jam miseræ nihil ipsa reliqui), Per connubia nostra, per inceptos hymenæos, Si bene quid de te merui, fuit aut tibi quidquam Dulce meum; miserere domus labentis, et istam, Oro, si quis adhuc precibus locus, exue mentem. Te propter Libycæ gentes, Nomadumque tyranni Odere; infensi Tyrii: te propter eundem Exstinctus pudor, et, quâ solâ sidera adibam, Fama prior. Cui me moribundam deseris, hospes ? Hoc solum nomen quoniam de conjuge restat. Quid moror ? an mea Pygmalion dum monia frater Destruat, aut captam ducat Gætulus Iarbas ?- Saltem, si qua mihi de te suscepta fuisset Ante fugam soboles; si quis mihi parvulus aulâ Luderet Æneas, qui te tamen ore referret; Non equidem omnino capta aut deserta viderer. Dixerat ille Jovis monitis immota tenebat Lumina, et obnixus curam sub corde premebat. Tandem pauca refert: Ego te, quæ plurima fando Enumerare vales, nunquam, Regina, negabo Promeritam; nec me meminisse pigebit Elissæ, Dum memor ipse mei, dum spiritus hos regit artus.
Pro re pauca loquar. Neque ego hanc abscondere furto
Speravi, ne finge, fugam; nec conjugis umquam
Prætendi tædas, aut hæc in fœdera veni. Me si fata meis paterentur ducere vitam Auspiciis, et sponte meâ componere curas; Urbem Trojanam primum, dulcesque meorum Reliquias colerem; Priami tecta alta manerent, Et recidiva manu posuissem Pergama victis. Sed nunc Italiam magnam Gryneus Apollo, Italiam Lyciæ jussere capessere sortes.
Hic amor, hæc patria est. Si te Carthaginis arces Phoenissam, Libycæque aspectus detinet urbis ; Quæ tandem, Ausoniâ Teucros considere terrâ Invidia est? Et nos fas extera quærere regna.
Me patris Anchisæ, quoties humentibus umbris Nox operit terras, quoties astra ignea surgunt, Admonet in somnis, et turbida terret imago : Me puer Ascanius, capitisque injuria cari, Quem regno Hesperiæ fraudo, et fatalibus arvis. Nunc etiam interpres divûm, Jove missus ab ipso (Testor utrumque caput), celeres mandata per auras Detulit. Ipse deum manifesto in lumine vidi Intrantem muros, vocemque his auribus hausi. Desine meque tuis incendere teque querelis: Italiam non sponte sequor.
Talia dicentem jamdudum aversa tuetur, Huc illuc volvens oculos, totumque pererrat Luminibus tacitis, et sic accensa profatur:
Nec tibi diva parens, generis nec Dardanus auctor,
Perfide; sed duris genuit te cautibus horrens Caucasus, Hyrcanæque admôrunt ubera tigres.
Nam quid dissimulo? aut quæ me ad majora reservo? Num fletu ingemuit nostro? num lumina flexit?
Num lacrimas victus dedit, aut miseratus amantem est? 370 Quæ quibus anteferam ? Jam jam, nec maxima Juno, Nec Saturnius hæc oculis pater aspicit æquis.
Nusquam tuta fides. Ejectum litore, egentem,
Excepi, et regni demens in parte locavi :
Amissam classem, socios a morte reduxi.
Heu Furiis incensa feror! nunc augur Apollo,
Nunc Lycia sortes, nunc et, Jove missus ab ipso, Interpres divûm fert horrida jussa per auras. Scilicet is Superis labor est! ea cura quietos
Sollicitat! Neque te teneo, neque dicta refello. I, sequere Italiam ventis; pete regna per undas. Spero equidem mediis, si quid pia numina possunt, Supplicia hausurum scopulis, et nomine Dido Sæpe vocaturum. Sequar atris ignibus absens; Et, quum frigida mors animâ seduxerit artus,
Omnibus Umbra locis adero. Dabis, improbe, pœnas:
Audiam, et hæc Manes veniet mihi fama sub imos. His medium dictis sermonem abrumpit, et auras Ægra fugit, seque ex oculis avertit et aufert,
Linquens multa metu cunctantem, et multa parantem 390 Dicere. Suscipiunt famulæ, collapsaque membra Marmoreo referunt thalamo, stratisque reponunt.
At pius Æneas, quamquam lenire dolentem Solando cupit, et dictis avertere curas,
Multa gemens, magnoque animum labefactus amore; 395 Jussa tamen divûm exsequitur, classemque revisit.
Tum vero Teucri incumbunt, et litore celsas Deducunt toto naves: natat uncta carina; Frondentesque ferunt remos et robora silvis
Infabricata, fugæ studio.
Migrantes cernas, totâque ex urbe ruentes:
Ac veluti, ingentem formicæ farris acervum
Quum populant, hiemis memores, tectoque reponunt; It nigrum campis agmen, prædamque per herbas Convectant calle angusto; pars grandia trudunt Obnixæ frumenta humeris; pars agmina cogunt, Castigantque moras; opere omnis semita fervet.
Quis tibi tunc, Dido, cernenti talia, sensus! Quosve dabas gemitus, quum litora fervere late Prospiceres arce ex summâ, totumque videres Misceri ante oculos tantis clamoribus æquor! Improbe amor, quid non mortalia pectora cogis! Ire iterum in lacrimas, iterum tentare precando Cogitur, et supplex animos submittere amori, Ne quid inexpertum frustra moritura relinquat. Anna, vides toto properari litore: circum Undique convenere: vocat jam carbasus auras, Puppibus et læti nautæ imposuere coronas.
Hunc ego si potui tantum sperare dolorem,
Et perferre, soror, potero. Miseræ hoc tamen unum Exsequere, Anna, mihi; solam nam perfidus ille
Te colere, arcanos etiam tibi credere sensus ;
Sola viri molles aditus et tempora nôras.
I, soror, atque hostem supplex affare superbum : Non ego cum Danais Trojanam exscindere gentem Aulide juravi, classemve ad Pergama misi; Nec patris Anchisæ cinerem Manesve revelli: Cur mea dicta negat duras demittere in aures? Quo ruit? extremum hoc miseræ det munus amanti : Exspectet facilemque fugam, ventosque ferentes. Non jam conjugium antiquum, quod prodidit, oro, Nec pulchro ut Latio careat, regnumque relinquat: Tempus inane peto, requiem spatiumque furori, Dum mea me victam doceat fortuna dolere. Extremam hanc oro veniam (miserere sororis!);
Quam mihi quum dederis, cumulatam morte remittam. Talibus orabat, talesque miserrima fletus
Fertque refertque soror; sed nullis ille movetur
Fletibus, aut voces ullas tractabilis audit:
Fata obstant, placidasque viri deus obstruit aures.
Ac velut, annoso validam quum robore quercum Alpini Boreæ, nunc hinc, nunc flatibus illinc Eruere inter se certant; it stridor, et alte Consternunt terram, concusso stipite, frondes; Ipsa hæret scopulis, et quantum vertice ad auras Ætherias, tantum radice in Tartara tendit :
Haud secus assiduis hinc atque hinc vocibus heros Tunditur, et magno persentit pectore curas;
Mens immota manet; lacrimæ volvuntur inanes.
Tum vero infelix, fatis exterrita, Dido Mortem orat; tædet cœli convexa tueri. Quo magis inceptum peragat, lucemque relinquat, Vidit, turicremis quum dona imponeret aris, (Horrendum dictu!) latices nigrescere sacros, Fusaque in obscœnum se vertere vina cruorem. Hoc visum nulli, non ipsi effata sorori. Præterea, fuit in tectis de marmore templum Conjugis antiqui, miro quod honore colebat,
Velleribus niveis, et festâ fronde revinctum : Hinc exaudiri voces, et verba vocantis
Visa viri, nox quum terras obscura teneret ; Solaque culminibus ferali carmine bubo Sæpe queri, et longas in fletum ducere voces. Multaque præterea vatum prædicta piorum Terribili monitu horrificant. Agit ipse furentem In somnis ferus Æneas; semperque relinqui Sola sibi, semper longam incomitata videtur Ire viam, et Tyrios desertâ quærere terrâ.
Eumenidum veluti demens videt agmina Pentheus, Et solem geminum, et duplices se ostendere Thebas: 470 Aut Agamemnonius scenis agitatus Orestes, Armatam facibus matrem, et serpentibus atris, Quum fugit, ultricesque sedent in limine Diræ.
Ergo, ubi concepit Furias, evicta dolore, Decrevitque mori, tempus secum ipsa modumque Exigit, et mostam dictis aggressa sororem, Consilium vultu tegit, ac spem fronte serenat : Inveni, germana, viam (gratare sorori),
Quæ mihi reddat eum, vel eo me solvat amantem. Oceani finem juxta, solemque cadentem, Ultimus Æthiopum locus est, ubi maximus Atlas Axem humero torquet stellis ardentibus aptum : Hinc mihi Massylæ gentis monstrata sacerdos, Hesperidum templi custos, epulasque draconi Quæ dabat, et sacros servabat in arbore ramos, Spargens humida mella, soporiferumque papaver. Hæc se carminibus promittit solvere mentes Quas velit, ast aliis duris immittere curas; Sistere aquam fluviis; et vertere sidera retro ; Nocturnosque ciet Manes: mugire videbis
Sub pedibus terram, et descendere montibus ornos. Testor, cara, deos, et te, germana, tuumque Dulce caput, magicas invitam accingier artes. Tu secreta pyram tecto interiore sub auras
« PreviousContinue » |