Sævit et in lucem Stygiis emissa tenebris
Pallida Tisiphone, Morbos agit antè Metumque, Inque dies avidum surgens caput altiùs effert.
et crebris mugitibus amnes
Arentesque sonant ripæ, collesque supini.
Jamque catervatim dat stragem, atque aggerat ipsis In stabulis turpi dilapsa cadavera tabo;
Donec humo tegere ac foveis abscondere discunt.
Nam neque erat coriis usus ; nec viscera quisquam Aut undis abolere potest, aut vincere flammâ ; Nec tondere quidem morbo illuvieque peresa Vellera; nec telas possunt attingere putres. Verùm etiam, invisos si quis tentârat amictus, Ardentes papulæ, atque immundus olentia sudor Membra sequebatur; nec longo deinde moranti Tempore contactos artus sacer ignis edebat.
PROTENUS aërii mellis cœlestia dona
Exsequar hanc etiam, Mæcenas, adspice partem. Admiranda tibi levium spectacula rerum, Magnanimosque duces, totiusque ordine gentis Mores, et studia, et populos, et prælia, dicam. In tenui labor; at tenuis non gloria; si quem Numina læva sinunt, auditque vocatus Apollo.
Principio sedes apibus statioque petenda, Quò neque sit ventis aditus (nam pabula venti Ferre domum prohibent,) neque oves hædique petulci 10 Floribus insultent, aut errans bucula campo Decutiat rorem, et surgentes atterat herbas.
Absint et picti squalentia terga lacerti
Pinguibus a stabulis, meropesque, aliæque volucres,
Et manibus Procne pectus signata cruentis : Omnia nam latè vastant, ipsasque volantes Ore ferunt, dulcem nidis immitibus escam.
At liquidi fontes et stagna virentia musco
Adsint, et tenuis fugiens per gramina rivus;
Palmaque vestibulum aut ingens oleaster inumbret ;
Ut, quum prima novi ducent examina reges
Vere suo, ludetque favis emissa juventus, Vicina invitet decedere ripa calori ;
Obviaque hospitiis teneat frondentibus arbos.
In medium, seu stabit iners, seu profluet humor,
Transversas salices et grandia conjice saxa; Pontibus ut crebris possint consistere, et alas Pandere ad æstivum solem ; si fortè morantes
Sparserit, aut præceps Neptuno immerserit Eurus. Hæc circum casiæ virides, et olentia latè Serpylla, et graviter spirantis copia thymbræ Floreat; irriguumque bibant violaria fontem.
Ipsa autem, seu corticibus tibi suta cavatis, Seu lento fuerint alvearia vimine texta, Angustos habeant aditus: nam frigore mella Cogit hiems, eademque calor liquefacta remittit.
Utraque vis apibus pariter metuenda: neque illæ Nequidquam in tectis certatim tenuia cerâ Spiramenta linunt, fucoque et floribus oras
Explent, collectumque hæc ipsa ad munera gluten Et visco et Phrygiæ servant pice lentius Idæ. Sæpè etiam effossis, si vera est fama, latebris Sub terrâ fovêre larem, penitùsque repertæ Pumicibusque cavis, exesæque arboris antro. Tu tamen e levi rimosa cubilia limo
Unge fovens circùm, et raras supèr injice frondes. Neu propiùs tectis taxum sine, neve rubentes Ure foco cancros; altæ neu crede paludi, Aut ubi odor cœni gravis, aut ubi concava pulsu
Saxa sonant, vocisque offensa resultat imago.
Quod superest, ubi pulsam hiemem Sol aureus egit
Sub terras, cœlumque æstivâ luce reclusit,
Illæ continuò saltus silvasque peragrant,
Purpureosque metunt flores, et flumina libant Summa leves. Hinc, nescio quâ dulcedine lætæ, Progeniem nidosque fovent: hinc arte recentes Excudunt ceras, et mella tenacia fingunt.
Hinc, ubi jam emissum caveis ad sidera cœli Nare per æstatem liquidam suspexeris agmen, Obscuramque trahi vento mirabere nubem, Contemplator; aquas dulces et frondea semper Tecta petunt. Huc tu jussos asperge sapores, Trita melisphylla, et cerinthæ ignobile gramen; Tinnitusque cie, et Matris quate cymbala circùm. Ipsæ consident medicatis sedibus; ipsæ
Intima more suo sese in cunabula condent.
Sin autem ad pugnam exierint; (nam sæpè duobus
Regibus incessit magno discordia motu,
Continuòque animos vulgi et trepidantia bello
Corda licet longè præsciscere; namque morantes Martius ille æris rauci canor increpat, et vox Auditur fractos sonitus imitata tubarum ;
Tum trepidæ inter se coëunt, pennisque coruscant, Spiculaque exacuunt rostris, aptant que lacertos, Et circa regem atque ipsa ad prætoria densæ Miscentur, magnisque vocant clamoribus hostem :) Ergo, ubi ver nactæ sudum camposque patentes, Erumpunt portis; concurritur; æthere in alto Fit sonitus; magnum mixtæ glomerantur in orbem, Præcipitesque cadunt: non densior aëre grando, Nec de concussâ tantum pluit ilice glandis. Ipsi per medias acies, insignibus alis,
Ingentes animos angusto in pectore versant ;
Usque adeò obnixi non cedere, dum gravis aut hos, Aut hos versa fugâ victor dare terga subegit. Hi motus animorum atque hæc certamina tanta Pulveris exigui jactu compressa quiescunt.
Verùm, ubi ductores acie revocaveris ambo, Deterior qui visus, eum, ne prodigus obsit, Dede neci; melior vacuâ sine regnet in aulâ. Alter erit maculis auro squalentibus ardens ; Nam duo sunt genera: hic melior, insignis et ore,
Et rutilis clarus squamis: ille horridus alter Desidiâ, latamque trahens inglorius alvum.
Ut binæ regum facies, ita corpora plebis. Namque aliæ turpes horrent; ceu pulvere ab alto Quum venit, et sicco terram spuit ore viator Aridus; elucent aliæ, et fulgore coruscant, Ardentes auro et paribus lita corpora guttis. Hæc potior soboles: hinc cœli tempore certo Dulcia mella premes; nec tantùm dulcia, quantùm Et liquida, et durum Bacchi domitura saporem. At quum incerta volant, coloque examina ludunt, Contemnuntque favos, et frigida tecta relinquunt, Instabiles animos ludo prohibebis inani. Nec magnus prohibere labor: tu regibus alas Eripe non illis quisquam cunctantibus altum Ire iter, aut castris audebit vellere signa. Invitent croceis halantes floribus horti ;
Et custos furum atque avium, cum falce salignâ, Hellespontiaci servet tutela Priapi.
Ipse, thymum pinosque ferens de montibus altis, Tecta serat latè circum, cui talia curæ ; Ipse labore manum duro terat; ipse feraces Figat humo plantas, et amicos irriget imbres.
Atque equidem, extremo ni jam sub fine laborum Vela traham, et terris festinem advertere proram, Forsitan et, pingues hortos quæ cura colendi Ornaret, canerem, biferique rosaria Pæsti ;
Quoque modo potis gauderent intuba rivis,
Et virides apio ripa, tortusque per herbam
Cresceret in ventrem cucumis; nec sera comantem
Narcissum, aut flexi tacuissem vimen acanthi, Pallentesque hederas, et amantes littora myrtos.
Namque sub Ebaliæ memini me turribus arcis,
Quâ niger humectat flaventia culta Galæsus, Corycium vidisse senem, cui pauca relicti Jugera ruris erant ; nec fertilis illa juvencis, Nec pecori opportuna seges, nec commoda Baccho. Hîc rarum tamen in dumis olus, albaque circùm Lilia, verbenasque premens, vescumque papaver, Regum æquabat opes animis; serâque revertens
Nocte domum, dapibus mensas onerabat inemptis. Primus vere rosam, atque autumno carpere poma; Et, quum tristis hiems etiam nunc frigore saxa Rumperet, et glacie cursus frænaret aquarum, Ille comam mollis jam tondebat hyacinthi,
Estatem increpitans seram, Zephyrosque morantes. Ergo apibus fætis idem atque examine multo
Primus abundare, et spumantia cogere pressis
Mella favis illi tiliæ, atque uberrima pinus ; Quotque in flore novo pomis se fertilis arbos Induerat, totidem autumno matura tenebat. Ille etiam seras in versum distulit ulmos, Eduramque pirum, et spinos jam pruna ferentes, Jamque ministrantem platanum potantibus umbras. Verùm hæc ipse equidem, spatiis exclusus iniquis, Prætereo, atque aliis post me memoranda relinquo. Nunc age, naturas apibus quas Jupiter ipse Addidit, expediam; pro quâ mercede, canoros Curetum sonitus crepitantiaque æra secutæ, Dictæo cœli regem pavêre sub antro.
Solæ communes natos, consortia tecta
Urbis habent, magnisque agitant sub legibus ævum ; Et patriam solæ, et certos novêre Penates: Venturæque hiemis memores, æstate laborem Experiuntur, et in medium quæsita reponunt. Namque aliæ victu invigilant, et fœdere pacto Exercentur agris pars intra septa domorum Narcissi lacrymam, et lentum de cortice gluten, Prima favis ponunt fundamina; deinde tenaces Suspendunt ceras: aliæ, spem gentis, adultos Educunt fœtus: aliæ purissima mella Stipant, et liquido distendunt nectare cellas.
Sunt, quibus ad portas cecidit custodia sorti;
Inque vicem speculantur aquas et nubila cœli ;
Aut onera accipiunt venientûm; aut, agmine facto, Ignavum, fucos, pecus a præsepibus arcent.
Fervet opus, redolentque thymo fragrantia mella. Ac veluti, lentis Cyclopes fulmina massis Quum properant, alii taurinis follibus auras Accipiunt redduntque, alii stridentia tingunt
« PreviousContinue » |