IV.

De effusione sanguinis Christi in remissione peccatorum.

An holy prayer here bygynnes,

In remedy of seuen dedly synnes.

Vij. blodes Crist he bled, The fyrst in his circumsycyon, The secund in holé oresown,

The deth when that he dred;
The thred in his flagellacion,
The fourth in his coronacion,
The fyfth in his hondis also,
The vj. in his holé fete,

The vii. blode ran out of his hert wete,
To wasche us out of our wo;
With moné an other enstrement,
He suffryd tene and turmentyng,

In his mon-heed.

In tyme of his passcion,

Here fore our redemcion,

His blesful blod he bled!

O Jhesu, fore the blod thou bledyst,
And in the furst tyme thou cheddust,

In thy circumcecion,

That I have synnyd in lechoré,

That stynkyng syn forezyf thou me,

And

my delectacion.

O Jhesu, at the mount of Olefete,

O Jhesu, thi payns were ful strong,

When the skorgis both scharp and long,
Mad thi body to bled.

To the, Lord, mercé I cry,

Thou kepe me out of glotoné,

And helpe me at my ned.

O Jhesu, fore thi scharp croune,
That mad the blod to ren adoune

About thi fayre face,

Ther proud in hert I have be,

Lord unbuxum to the,

Grawnt mercé and grace.

O Jhesu, as I understond

Thou ched blod at both thi hond,

When thai were naylid,

Thou cast me out of covetyse,

And graunt me grace sone to aryse,

Of syn when I am seylid.

O Jhesu, thou bledyst more blod,

Wen thou wast nayld apon the rood,

Throz thi fete with naylis.

Let me never in slouth stynke,

Bot grawnt me grace for to swynke,
Thyng me avaylis.

O Jhesu, blessid be thi bones,

Fore blod and water thou chedist at once,

Out of thi pressious hert.

Out of wrath kepe thou me,

And grawnd me love and charyté,

For thi wondis smert.

O Jhesu, for the peler strong,

Thi bodi was bound therto with wrong,
Y-buffet and y-blend.

That holé cherche as bound me to,

Grawnt me grace that fore to do,

Lest I be chamyd and schent.

O Jhesu, fore thi blesful face,

Thou betoke Veroneca bi grace,
Upon here sudaré.

That face be ne consolacion,

And to the fynd confusion,

That day when I schal dye.

O Jhesu, fore thi holé cros,
Thi body sprad theron was,

Fore our syn sake.

That cros be my proteccion

Azayns my nenmys everychon,

Weder I slepe or wake.

O Jhesu, fore thi naylis thre,
That persid the to the rod tre,

Y-drevyn with gret distres;
Thou grawnt me repentawns,
Fore my syns to do penans,
My payns to relesse.

O Jhesu, fore the vessel also,
That aysel and gal thai bro3t the to,
That drenke hit was unsete;

That I have synd in glotency,
That stynkyng syn forzif thou me,

That me hath thozt ful swete.

O Jhesu, fore the charp spore,

That throz thyn hert Longyus can bere,
That was a blynd knyzt;

Thou perse me hert with contricion,
Fore the syns I have edone,

As thou 3if him his sy3t.

O Jhesu, fore the lovelé ladder,
And fore the tongis and fore hamyr,
That laust the fro the tre;

Thou graunt me contemplacion
To theng the fore thi passioun,
That thou soferest fore me.

O Jhesu, as Josep of Haramathé
Beryd the ful onestlé

In his monument,

Fore thi gloryous resurexion,

And thi marvelis assencion,
Thou grawnt me remyssion,
Tofore thi jugement.

In worchip of thi holé passion,
And of my syns remyssion,

xv. pater noster y say; And xv. avés to Our Lady, Fore heo is the wel of al pyté,

That heo wel fore me pray.

He that says this prayere
Every day in the zere,

He worchips euere wonde;
That Crist sofyrd fore his sake,
Fore his syns amendis to make,
I-blessid be that stounde.

Wherefore y pray 30ue specialy
That ze say hit dewoutly,

3oure souls 3e may save;

Fore Crist hath grawndtid seche a grace,
In heven he schal have a plasse,

That other schal no3t have,

That ffulfyld not this prayere,

And worchipd not his passion wyle thai bene here

With devocion;

Thes that to him be unkynd,

He wil not have ham in mynd,

In here trebulacion.