AD FESTIVITATEM SEMISAECULAREM SOCIETATIS PRAECEPTORUM GYMNASIORUM NEDERLANDICORUM ET SCHOLARUM CIVICARUM ORDINIS SUPERIORIS UNO HILARIQUE ANIMO CONCELEBRANDAM CUM EOS QUI SUA SPONTE SE CONIUNXERUNT ET QUI HIS ACCEDERE VOLENT TUM EOS QUI HONORIS CAUSA ADSCRIPTI SUNT UT CONVENTUI LEIDAE HABENDO FREQUENTES ADESSE VELINT OBLATO HOC MUNUSCULO OFFICIOSE HUMANITERQUE HORTATUR W. H. D. SURINGAR PRAESES H. A. HONORARIUS. K. K. TRAGOEDIA EX SEGMENTIS PRIORUM LIBRORUM AENEIDOS COMPOSITA AB AUCTORE INCERTO CUIUS AUTOGRAPHUM POSSIDET BIBLIOTHECA LEIDENSIS. EDIDIT W. H. D. SURINGAR, LITT. DOCT. LUGDUNI BATAVORUM APUD FRATRES VAN DER HOEK. 1880. 23.550-B.Nu- PRAEFATIO. Scenica Romanorum poesis, si numerum comoediarum et tragoediarum, e quibus fragmenta quantulacunque servata sunt, componimus cum annorum quibus ea floruit paucitate, prope est ut poesin Graecorum aequaverit, quam constat in hoc genere fuisse ditissimam. Ea vero tantam per medii aevi tempora fecit iacturam ut omnia omnino pessum iisse dolendum fuisset, nisi Plauti superessent comoediae et Terentii cum tragoediis aliquot, quae aut Senecae sunt aut saltem eius nomine feruntur. Quanto autem minus ex hoc scriptionis genere nobis reliquerit barbarorum temporum incuria, tanto magis fere dixeris meliorum quae secuta sunt temporum diligentiam studuisse ut acceptam nobis resarciret calamitatem. In omnibus quippe eruditioris Europae partibus incredibile est quanta duobus praesertim saeculis XVI et XVII prodierit comoediarum et tragoediarum multitudo Latino sermone scriptarum. Mihi saltem in hanc posterioris aevi literarum Latinarum partem ab aliquot annis inquirenti contigit ut ex catalogis librorum et aliis cuicuimodi generis subsidiis non minus quam ducentorum poetarum nomina expiscari potuerim, a quibus plus quam mille vidi confectas esse fabulas. Istae vero fabulae, quae partim in lucem editae sunt, partim modo inter manus versatae, eo consilio videntur esse compositae, ut in scena agerentur aut ab Academiarum civibus aut a Gy |