CATALECTA

QVAE

VIRGILIANA

VVLGO AVDIVNT.

I.

Delia,

elia, Tucca, tibi venit: Sed, Seie, videre

Non licet: Occulitur limine clausa viri.

Delia, Seie, tibi, non venit adhuc mihi: namque, Si occulitur, longe est, tangere quod nequeas. Venerit illa tibi: sed iam iam mihi nuntius iste Quid prodest? illi dicito, cui rediit.

II.

Corinthiorum amator iste verborum,

Iste iste rhetor! namque quatenus totus
Thucydides Britannus, Attice febris,

TAV Gallicum, MIN, SIL, et AL male illisit,
Ista omnia, ista verba miscuit fratri.

III.

Socer beate nec tibi nec alteri,
Generque Noctuine, putidum caput,
Tuone nunc puella talis, heu tuo
Stupore pressa rus abibit? Hei mihi!
Vt ille versus usquequaque convenit:

Gener, socerque perdidistis omnia.

IV.

Superbe Noctuine, putidum caput,
Datur tibi puella, quam petis: datur,
Datur, superbe Noctuine, quam petis.
Sed, o superbe Noctuine, non vides
Duas habere filias Atilium?

Duas, et hanc, et alteram, tibi dari?
Adeste nunc, adeste; ducit, ut decet,
Superbus, ecce, Noctuinus hirneam.

Iacere

V.

me, quod alta non possim, putas,

Vt ante, vectari freta;

Nec ferre durum frigus, aut aestum pati,

Neque arma victoris sequi.

Valent, valent mihi ira et antiquus furor,

Et lingua, qua iam adsim tibi. Hei! prostitutae turpe contubernium Sororis, o quid me incitas?

Quid, impudice, et improbande Caesari,

Si furta dicantur tua?

Et heluato sera patrimonio

In fratre parsimonia?

Vel acta puero cum viris convivia,

Vdaeque per somnum nates?

Et inscio repente clamatum super,

Thalassio, Thalassio?

Quid palluisti, femina? an ioci dolent?
An facta cognoscis tua?

Non me vocabis pulchra per Cotyttia

Ad feriatos fascinos?

Nec dein movere lumbos in crocotula

Prensis videbo alaribus?

Flavum prope et Thybrim te olentes nauticum Vocare, ubi appulsae rates

Stant in vadis coeno retentae sordido,

Macraque luctantes aqua?

Neque in culinam, et uncta compitalia,
Dapesque duces sordidas?

Quibus repletus, ut salivosis apris,

Obesam ad uxorem redis:

Et aestuantes docte solvis pantices,
Olusque lambis saviis.

Nunc laede, nunc lacesse, si quidquam vales!

Et nomen adscribo tuum.

Cinaede Luci, en, te reliquerunt opes;

Fameque genuini crepant.

Videbo habentem praeter ignavos nihil

Fratres, et iratum Iovem,

Scissumque ventrem, et herniosi patrui
Pedes inedia turgidos.