Xpc le fitz Marie, le tresnoble enfaunt, Defent qe vyleynye ne soit desorenavant Dit par nulle folye à nulle femme vivant! Mès chescun ayme s'amye, come Dieu nus est amaunt Que sa douce face en terre, en ciel pussoms vere. sope, fenoil, columbyn, Flur de lyls alosée, Deveroit crestre u chemyn, où femme marche soun pée; Certes cely ad bon matyn saunz feyntyse; Quar unqe femme ne fust, si noun de bon aprise. Zabulon, come je vus counte, c'est un propre noun, Cely que bone femme afrounte, jà n'eit s'alme pardoun! Fuisse-je roy ou grant counte, ou de terre noble baroun, Quy à femme ferreit hounte, tost le mettroi en prisoun sanz tort; Si il ne se vodra amender, jà n'avereit resort. Douce amie, seiez certeigne, que de Dieu serra maldit, Qe de male parole e veyne dient à femme hounte ou despyt; Quar Dieu meismes sauntz nulle peyne de une femme en terre nasquyt, La quele en ciel sa joye demeyne ; de ly servyr ay grant delyt à grée ; Quar ele est de joie fonteyne. source de amistée. Place là ou femme siet, en sale ou banc countre mur, Totes vileynyes het, tant come porte fruit si pur, De totes arbres dount fueille chet, si est femme sovereyn flur, Chescun homme à mieux qu'il puet, sauve lur cors e lur honur de hounte, Quar totes choses avenauntes, bone femme sourmounte. Cruelement s'en vont lyé, par la grace de ly puissaunt; Si ne fust sa grant humilité, qe mostre à femme vertu grant; Jamès femme de mere née ne fust delyvrés de un enfant, Mount seofrent pur nostre amisté, e meintefoiz vont suspirant pur amour; Molt sovent lur nateresse lur torne à grant dolour. Ave Maria devoms dire pur totes femmes qe grosses sount, Lur colour pur nus empire. de sale en chaunbre quant eles vont ; Prioms Jhesum, nostre sire, que en sa joie siet là à mount, Que si ly plest lur veile myre les anguisses que pur nus ount, Dieu sauve l'onour de femmes, Amen devoms trestous dire, benet seit le tresdouz mort Que pur nus soffrir nostre sire, que d'enfern nus dona resort, E en terre soffry grant martyre, sauntz desert à graunt tort, Saunz rancour e sanz ire, pur nus soffry peyne fort, en croys, La joie de ciel nus ad graunté, meismes de sa voys. II. [Fol. 55, ro.] QUANT Voy la revenue d'yver, qe si me argue qe ly temps se remue, lors aym buche fendue, charboun clykant, tysoun flambaunt, feu de souche meis ne de joie chaunt; quar je l'eym tant, tot le cors me tressue. Quaunt vient acochier, certes molt me agrée fagot en fournil secche sauntz fumeé, qe tost esprent e brese rent; e je me degrat molt sovent le pys e l'eschyne, quar la char bien pue, e de draps mal vestue; ayme molt la jorné, quar quaunt pur chalour se sue taunt, qe fors soit issue la freydour e alée, çeo est moun delit, de aver beau lit de dras braunchys, fleyre la buée. La tenue coverture c'est ma desconfiture, lange sauntz foreure, de celi n'ai-je cure, quar il n'est preuz; mieux aym les feus quant je voy la refroidure, à ly m'en von mieux, aym son jou que dous dées detorsure. Quaunt l'yver s'esteynt par la matynée, certes molt me grevée la noyf e la gelée; mès en verglaz atourner faz menues hastes en bruaz en bon morsel donée, |