Scilicet et rerum facta est pulcherrima Roma, Septemque una sibi muro circumdedit arces. Ante etiam sceptrum Dictaei regis, et ante Inpia quam caesis gens est epulata juvencis, Aureus hanc vitam in terris Saturnus agebat. Necdum etiam audierant inflari classica, necdum Inpositos duris crepitare incudibus enses. Sed nos inmensum spatiis confecimus aequor: Et jam tempus equûm fumantia solvere colla.
“E quoque, magna Pales, et te memorande canemus Pastor ab Amphryso: vos, silvae amnesque Lycei. Cetera, quae vacuas tenuissent carmine mentis, Oninia jam volgata. quis aut Eurysthea durum, Aut inlaudati nescit Busiridis aras?
Cui non dictus Hylas puer, et Latonia Delos? Hippodameque, humeroque Pelops insignis eburno, Acer equis? tentanda via est, qua me quoque possim Tollere humo, victorque virûm volitare per ora. Primús ego in patriam mecum, modo vita supersit, Aonio rediens deducam vertice Musas: Primus Idumaeas referam tibi, Mantua, palmas: Et viridi in campo templum de marmore ponam Propter aquam, tardis ingens ubi flexibus errat Mincius, et tenera praetexit arundine ripas. In medio mihi Caesar erit, templumque tenebit. Illi victor ego, et Tyrio conspectus in ostro Centum quadrijugos agitabo ad flumina currus. Cuncta mihi, Alpheum linquens lucosque Molorchi, Cursibus et crudo decernet Graecia cestu. Ipse, caput tonsae foliis ornatus olivae,
Dona feram. jam nunc sollemnis ducere pompas Ad delubra juvat, caesosque videre juvencos:
Vel scaena ut versis discedat frontibus; utque Purpurea intexti tollant aulaea Britanni. In foribus pugnam ex auro solidoque elephanto Gangaridum faciam, victorisque arma Quirini: Atque hic undantem bello, magnumque fluentem Nilum, ac navali surgentis aere columnas. Addam urbis Asiae domitas, pulsumque Niphaten, Fidentemque fuga Parthum versisque sagittis, Et duo rapta manu diverso ex hoste tropaea, Bisque triumphatas utroque ab litore gentis. Stabunt et Parii lapides, spirantia signa, Assaraci proles, demissaeque ab Jove gentis Nomina, Trosque parens, et Trojae Cynthius auctor. Invidia infelix Furias amnemque severum
Cocyti metuet, tortosque Ixionis anguis, Inmanemque rotam, et non exsuperabile saxum. Interea Dryadum silvas saltusque sequamur Intactos, tua, Maecenas, haud mollia jussa. Te sine nil altum mens inchoat. en age, segnis Rumpe moras: vocat ingenti clamore Cithaeron, Taygetique canes, domitrixque Epidaurus equorum: Et vox adsensu nemorum ingeminata remugit. Mox tamen ardentis adcingar dicere pugnas Caesaris, et nomen famâ tot ferre per annos, Tithoni prima quot abest ab origine Caesar.
Seu quis, Olympiacae miratus praemia palmae, Pascit equos; seu quis fortis ad aratra juvencos, Corpora praecipue matrum legat. optuma torvae Forma bovis, cui turpe caput, cui plurima cervix, Et crurum tenus a mento palearia pendent. Tum longo nullus lateri modus: omnia magna: Pes etiam, et camuris hirtae sub cornibus aures. Nec mihi displiceat maculis insignis et albo, Aut juga detrectans; interdumque aspera cornu,
Et faciem tauro propior, quaeque ardua tota, Et gradiens ima verrit vestigia cauda. Aetas Lucinam, justosque pati hymenaeos Desinit ante decem, post quatuor incipit annos: Cetera nec foeturae habilis, nec fortis aratris. Interea, superat gregibus dum laeta juventas, Solve mares: mitte in Venerem pecuaria primus, Atque aliam ex alia generando suffice prolem. Optuma quaeque dies miseris mortalibus aevi Prima fugit: subeunt morbi, tristisque senectus; Et labor, et durae rapit inclementia mortis. Semper erunt, quarum mutari corpora malis. Semper enim refice: ac, ne post amissa requiras, Anteveni, et subolem armento sortire quot annis. Nec non et pecori est idem dilectus equino. Tu modo, quos in spem statues submittere gentis, Praecipuum jam inde a teneris inpende laborem, Continuo pecoris generosi pullus in arvis Altius ingreditur, et mollia crura reponit. Primus et ire viam, et fluvios tentare minaces Audet, et ignoto sese committere ponti : Nec vanos horret strepitus. illi ardua cervix, Argutumque caput, brevis alvus, obesaque terga: Luxuriatque toris animosum pectus: honesti Spadices, glaucique; color deterrimus albis, Et gilvo. tum, si qua sonum procul arma dedere, Stare loco nescit: micat auribus, et tremit artus; Conlectumque premens volvit sub naribus ignem : Densa juba, et dextro jactata recumbit in armo. At duplex agitur per lumbos spina, cavatque Tellurem, et solido graviter sonat ungula cornu. Talis Amyclaei domitus Pollucis habenis Cyllaris, et, quorum Graji meminere poëtae, Martis equi bijuges, et magni currus Achilli
Talis et ipse jubam cervice effundit equina Conjugis adventu pernix Saturnus, et altum
Pelion hinnitu fugiens inplevit acuto.
Hunc quoque, ubi aut morbo gravis, aut jam segnior annis Deficit, abde domo; nec turpi ignosce senectae. Frigidus in Venerem senior, frustraque laborem Ingratum trahit: et, si quando ad proelia ventum est, Ut quondam in stipulis magnus sine viribus ignis, Incassum furit. ergo animos aevumque notabis Praecipue hinc alias artis, prolemque parentum, Et quis cuique dolor victo, quae gloria palmae. Nonne vides, quum praecipiti certamine campum Conripuere, ruuntque effusi carcere currus, Quum spes adrectae juvenum, exsultantiaque haurit Corda pavor pulsans: illi instant verbere torto, Et proni dant lora: volat vi fervidus axis. Jamque humiles, jamque elati sublime videntur Aëra per vacuum ferri, atque adsurgere in auras. Nec mora, nec requies. at fulvae nimbus arenae Tollitur: humescunt spumis, flatuque sequentum. Tantus amor laudum, tantae est victoria curae. Primus Erichthonius currus et quatuor ausus Jungere equos, rapidusque rotis insistere victor. Frena Pelethronii Lapithae, gyrosque dedere Inpositi dorso, atque equitem docuere sub armis Insultare solo, et gressus glomerare superbos. Aequus uterque labor: aeque juvenemque magistri Exquirunt, calidumque animis et cursibus acrem. Quamvis saepe fuga versos ille egerit hostis, Et patriam Epirum referat, fortisque Mycenas; Neptunique ipsa deducat origine gentem. His animadversis instant sub tempus, et omnis Inpendunt curas denso distendere pingui, Quem legere ducem, et pecori dixere maritum :
« PreviousContinue » |