Venturam, et nostros ea fata manere nepotes. Talibus insidiis perjurique arte Sinonis Credita res, captique dolis lacrimisque coactis, Quos neque Tydides, nec Larissaeus Achilles, Non anni domuere decem, non mille carinae.
Hic aliud majus miseris multoque tremendum Objicitur magis, atque inprovida pectora turbat. Laocoon, ductus Neptuno sorte sacerdos, Sollemnis taurum ingentem mactabat ad aras. Ecce autem gemini a Tenedo tranquilla per alta, Horresco referens, inmensis orbibus angues Incumbunt pelago, pariterque ad litora tendunt: Pectora quorum inter fluctus adrecta, jubaeque Sanguineae exsuperant undas: pars cetera pontum Pone legit, sinuantque inmensa volumine terga. Fit sonitus, spumante salo: jamque arva tenebant, Ardentisque oculos suffecti sanguine et igni, Sibila lambebant linguis vibrantibus ora. Diffugimus visu exsangues. Illi agmine certo Laocoonta petunt: et primum parva duorum Corpora natorum serpens amplexus uterque Inplicat, et miseros morsu depascitur artus. Post ipsum, auxilio subeuntem ac tela ferentem, Conripiunt, spirisque ligant ingentibus: et jam Bis medium amplexi, bis collo squamea circum Terga dati, superant capite et cervicibus altis. Ille simul manibus tendit divellere nodos, Perfusus sanie vittas atroque veneno: Clamores simul horrendos ad sidera tollit Qualis mugitus, fugit quum saucius aram Taurus, et incertam excussit cervice securim. At gemini labsu delubra ad summa dracones Effugiunt, saevaeque petunt Tritonidis arcem: Sub pedibusque deae, clipeique sub orbe teguntur.
Tum vero tremefacta novus per pectora cunctis Insinuat pavor: et scelus expendisse merentem Laocoonta ferunt; sacrum qui cuspide robur Laeserit, et tergo sceleratam intorserit hastam. Ducendum ad sedes simulacrum, orandaque divae Numina conclamant.
Dividimus muros, et moenia pandimus urbis. Adcingunt omnes operi, pedibusque rotarum Subjiciunt labsus, et stuppea vincula collo Intendunt. Scandit fatalis machina muros, Foeta armis. Pueri circum innuptaeque puellae Sacra canunt, funemque manu contingere gaudent. Illa subit, mediaeque minans inlabitur urbi.
O patria, o Divûm domus Ilium, et inclyta bello Moenia Dardanidum! quater ipso in limine portae Substitit, atque utero sonitum quater arma dedere. Instamus tamen inmemores caecique furore, Et monstrum infelix sacrata sistimus arce. Tunc etiam fatis aperit Cassandra futuris Ora, Dei jussu non umquam credita Teucris. Nos delubra Deûm miseri, quibus ultimos esset Ille dies, festa velamus fronde per urbem. Vertitur interea coelum, et ruit oceano nox, Involvens umbra magna terramque polumque, Myrmidonumque dolos: fusi per moenia Teucri Conticuere: sopor fessos complectitur artus.
Et jam Argiva phalanx instructis navibus ibat A Tenedo, tacitae per amica silentia lunae, Litora nota petens: flammas quum regia puppis Extulerat fatisque Deûm defensus iniquis, Inclusos utero Danaos et pinea furtim Laxat claustra Sinon : illos patefactus ad auras Reddit equus, laetique cavo se robore promunt. Thessandrus Sthenelusque duces, et dirus Ulixes,
Demissum labsi per funem, Acamasque, Thoasque, Pelidesque Neoptolemus, primusque Machaon, Et Menelaus, et ipse doli fabricator Epeos, Invadunt urbem somno vinoque sepultam. Caeduntur vigiles, portisque patentibus omnis Adcipiunt socios, atque agmina conscia jungunt. Tempus erat, quo prima quies mortalibus aegris Incipit, et dono Divûm gratissima serpit. In somnis, ecce, ante oculos maestissimus Hector Visus adesse mihi, largosque effundere fletus; Raptatus bigis, ut quondam, aterque cruento Pulvere, perque pedes trajectus lora tumentis. Hei mihi, qualis erat! quantum mutatus ab illo Hectore, qui redit exuvias indutus Achilli, Vel Danaûm Phrygios jaculatus puppibus ignis! Squalentem barbam, et concretos sanguine crinis, Vulneraque illa gerens, quae circum plurima muros Adcepit patrios. Ultro flens ipse videbar Conpellare virum, et maestas expromere voces: O lux Dardaniae, spes o fidissima Teucrûm, Quae tantae tenuere morae? quibus Hector ab oris Expectate venis? ut te post multa tuorum Funera, post varios huminumque urbisque labores Defessi adspicimus! quae caussa indigna serenos Foedavit voltus? aut cur haec vulnera cerno? Ille nihil: nec me quaerentem vana moratur: Sed graviter gemitus imo de pectore ducens, Heu fuge, nate Dea, teque his, ait, eripe flammis. Hostis habet muros: ruit alto a culmine Troja. Sat patriae Priamoque datum. Si Pergama dextra Defendi possent, etiam hac defensa fuissent. Sacra suosque tibi commendat Troja Penates: Hos cape fatorum comites: his moenia quaere, Magna pererrato statues quae denique ponto.
Sic ait: et manibus vittas, Vestamque potentem, * Aeternumque adytis effert penetralibus ignem. Diverso interea miscentur moenia luctu:
Et magis atque magis, quamquam secreta parentis Anchisae domus, arboribusque obtecta recessit, Clarescunt sonitus; armorumque ingruit horror. Excutior somno, et sunimi fastigia tecti Adscensu supero, atque adrectis auribus adsto. In segetem veluti quum flamma furentibus austris Incidet, aut rapidus montano flumine torrens Sternit agros, sternit sata laeta, boumque labores; Praecipitesque trahit silvas: stupet inscius alto Adcipiens sonitum saxi de vertice pastor.
Tum vero manifesta fides, Danaûmque patescunt Insidiae. Jam Deiphobi dedit ampla ruinam, Volcano superante, domus: jam proxumus ardet Ucalegon: Sigea igni freta lata relucent. Exoritur clamorque virûm clangorque tubarum. Arma amens capio; nec sat rationis in armis: Sed glomerare manum bello, et concurrere in arcem Cum sociis ardent animi. Furor iraque mentem Praecipitant; pulchrumque mori succurrit in armis. Ecce autem telis Panthus elapsus Achivôm, Panthus Othryades, arcis Phoebique sacerdos, Sacra manu, victosque Deos, parvumque nepotem Ipse trahit, cursuque amens ad litora tendit. Quo res summa loco, Panthu? quam prendimus arcem? Vix ea fatus eram, gemitu quum talia reddit: Venit summa dies, et ineluctabile tempus
Dardaniae. Fuimus Troës: fuit Ilium, et ingens Gloria Teucrorum. Ferus omnia Juppiter Argos Transtulit. Incensa Danai dominantur in urbe. Arduus armatos mediis in moenibus adstans Fundit equus, viatorque Sinon incendia miscet, R
Insultans. Portis alii bipatentibus adsunt, Millia quot magnis umquam venere Mycenis: Obsedere alii telis angusta viarum
Oppositi, stat ferri acies mucrone corusco Stricta, parata neci: vix primi proelia tentant Portarum vigiles, et caeco Marte resistunt. Talibus Othryadae dictis et numine Divûm In flammas et in arma feror: quo tristis Erinnys, Quo fremitus vocat, et sublatus ad aethera clamor. Addunt se socios Ripheus, et maxumus armis Epytus: oblati per lunam Hypanisque Dymasque: Et lateri adglomerant nostro: juvenisque Coroebus Mygdonides. Illis ad Trojam forte diebus Venerat, insano Cassandrae incensus amore:
Et gener auxilium Priamo Phrygibusque ferebat. Infelix, qui non sponsae praecepta furentis Audierit.
Quos ubi confertos audere in proelia vidi; Incipio super his: Juvenes, fortissima frustra Pectora, si vobis audentem extrema cupido Certa sequi, (quae sit rebus fortuna videtis: Excessere omnes adytis arisque relictis
Dî, quibus imperium hoc steterat) succurritis urbi Incensae. Moriamur, et in media arma ruamus. Una salus victis, nullam sperare salutem.
Sic animis juvenum furor additus. Inde, lupi ceu Raptores atra in nebula, quos inproba ventris
Exegit caecos rabies, catulique relicti
Faucibus exspectant siccis; per tela, per hostis
Vadimus haud dubiam in mortem: mediaeque tenemus Urbis iter. Nox atra cava circumvolat umbra.
Quis cladem illius noctis, quis funera fando Explicet, aut possit lacrimis aequare labores? Urbs antiqua ruit, multos dominata per annos:
« PreviousContinue » |