III.

Have in mynd, in mynd, in mynd, secuters be oft onekynd.

MAN, be war, the way ys sleder,

Thy sowle sall go thou wottes not weder,
Body and sowle and al togeder,

Lytyll joye ys son done.

Have thi sowle in thi mynd,

The secators be ryght onkynd;

Man, be thi own freynd,

Lytyll joye ys son done.

In holy bok yt ys wreten,

That sely soule ys son forgeten,

And treu yt ys for to seken;

Syng another for the ;

God send us love and charité !

Lytyll joye ys son done.

IV.

HERFOR, and therfor, and therfor I came,
And for to preysse this praty woman.
Ther wer iij wylly, 3te wyly ther wer;
A fox, a fryyr, and a woman.

Ther wer 3 angry, 3 angry ther wer:

A wasp, a wesyll, and a woman.

Ther wer 3 cheteryng, iij. cheteryng ther wer:

A peye, a jaye, and a woman.

Ther wer 3 wold be betyn, 3 wold be betyn ther wer:

A myll, a stoke fysche, and a woman.

V.

Er virgine natus, Christe, es sine macula;
Mortis pomo cepit homo quam rumpens jacula,
Nos gaudere et habere fac habitacula,
Ubi manes cunta regens unicus per secula.

Spiritus sancte, Deus, fer nobis juvamen,
Cui fuisti matri Christi sacrum consolamen,
Da cum judex advenit rex ad nostrum examen,
Nos unitas in qua extas Deus servet. Amen.

VI.

For pencynesse and grett distresse I am full woo;
Destitute frome al refute, alone I goo.

WHYLOME I present was with my soffreyne,
Ignorawnt I was of dolowr and payne;

For than I lyved

Fro sorow deprived;

Of plesure havyng habundawnce and delice.

But now forsothe

Sore hytt me ruthe,

Fortune contrarythe to my device.

For pencynesse, etc.

Whane fortune flatery ay deseveabyll,
My hert enycyed by prosyrs delectabyll,
I thowzt in mynd

I schuld ay fynd

The whele of fortunat fyxyd fast;

Nott for no chawnce

To mak delyawnce,

Whyle my terme of lyff had past.

For pencynesse, etc.

Butt now prosyrs glorius be myxyd with gall, Wyche bytter ys and tedius over all;

Venimus as poysen,

To me full naysom. And from her palyse ryall,

Ful cruelly

And onavysedly

Sche hath soferyd me to fall.

For pencynesse, etc.

And into gret dole and mysery,

Devoyd of all felyce,

With her owtrage,

Me puttyng to damnag,

With hert contrystant thyse wordes I sey:

For pencynesse

And hyre distresse

Fad doth my yoye and wannych awey.

For pencynesse, etc.

For by her rygurus and crabyd violence,
Preventyd me sche hath of my pretence,
Constreynyng me to fulfyll

That repugnant is to my wyll;
For ther as I never entendyd to be abcent,
Distawnce of place,

Hyherd myschawnce and case,

Utterly hath alteryd my purpose and entent.
For pencynesse, etc.

Schuld I not morne and in hert be sad,

Whan slydery cyn, wych never abydyng had,

Wher syght ys nout, farwel thow3t, and have gud

For pencynesse, etc.

Thus my enmye mortale doyth determyne,

With dystawnce of place and current tyme
Me wyl confownd,

And never to redwnd,

[day.

But me consume and utterly wast;

And of al resort

Of joy and comfort,

Desolate me make and in penurye me cast.
For pencynesse, etc.

Whome nature excellently hath avawncyd,

And hevynly grace gyftes most and syngularly hath enhawncyd,

In bewte, in sagacite,

In facund spech and in benyngnyte,

In behavyowr gudly, me umbyll in spyryt,

And sondry wertuse,

Wych canot discuse,

Frome hym am I sewrd be fortuns despit.
For pencynesse, etc.

VII.

Now ys wele and all thyng ary3t,
And Cryst ys come as a trew knyght;
For owr broder ys kyng of my3t,
The fend to fleme and all hys;
Thus the feend ys put to flygt,
And all his boost abatyd ys.

Sythyn yt is we wele we do,
For ther ys non but one of two,
Hevyn to gete or hevyn for-go,